Pillareando

Este ano teño o gusto de colaborar como voluntaria ca SEO Pontevedra nas tarefas de vixilancia dos niños de píllara das dunas ou chorlitejo patinegro (Charadrius alexandrinus) nas praias do Salnés.

Esta pequena e simpática ave considerase como "ameazada" en Galicia por mor da perda do seu hábitat.

Nas nosas rondas diarias os voluntarios facemos un seguimento dos niños da píllara (número de postas, control dos balizados, control de cans nas praias, seguimento da supervivencia das crías, etc.) todo isto en colaboración co Servizo de Protección da Natureza da Xunta de Galicia.

Tamén se leva a cabo unha labor de educación ambiental, informándolle á xente do valor que ten que a píllara aniñe nestas praias e a responsabilidade compartida en canto a súa conservación. Incídese moito na colaboración para que a xente non leve os seus cans ás praia en época de cría, xa que comprobouse que este factor é causa do destrozo, abandono de niños e mortandade non natural das crías.

Claro que a conservación da píllara ten moitos outros frentes abertos...

Na miña última ronda acompañoume a miña compañeira de clube de orientación Ana Belén Crespo, e é grazas a ela que podo deixarvos esta fermosa foto dunha das familias de píllara do Salnés que loita por sacar ós seus pitiños adiante:

Familia de píllaras - Foto: Ana B. Crespo